میں اپنی نوجوانی کے دنوں میں تھا جب میرے ملک میں سیاسی انقلاب آیا اور حکومت کا نظام تبدیل ہوا۔ ابھی ملک اپنے نئے نظام کی تعمیرِ نو کے مرحلے سے گزر ہی رہا تھا کہ ہمارے مغربی ہمسائے نے، جو خود کو ہمارا حریف سمجھتے تھے، ان دنوں کی ہماری فوجی کمزوری سے فائدہ اٹھایا اور ہم پر حملہ کر دیا۔ انہوں نے ہماری سرزمین کے ایک وسیع حصے پر قبضہ کر لیا۔ اس سے پہلے کہ فوج اور حکومت سنبھل پاتیں اور دشمن کا راستہ روک پاتیں، یہ عوام ہی تھے جنہوں نے اپنی جانوں کی قربانی دے کر سرحدوں کا دفاع کیا، دشمن کو روکا اور برسوں تک لڑتے رہے، یہاں تک کہ اسے عزیز وطن سے نکال باہر کیا۔
اس جنگ میں تقریباً دس لاکھ لوگ شہید ہوئے، جن میں میرے دو بھائی بھی شامل تھے۔
جنگ کے بعد میری زندگی میں سفر کا ایک طویل دور شروع ہوا۔ میں کئی ممالک میں رہا، کئی زبانیں سیکھیں، اپنی عزیز شریکِ حیات سے ملاقات ہوئی، اور ہم نے مل کر ایک پُرمغامرا زندگی کا آغاز کیا۔ پینتیس برس سے زیادہ عرصے تک میں بیک وقت کئی مختلف پیشوں سے وابستہ رہا۔ اس دوران میری ملاقات بے شمار لوگوں سے ہوئی؛ عرب ممالک کے شہزادوں اور یورپ کی معروف شخصیات سے لے کر اہم سیاست دانوں، بین الاقوامی تاجروں، جامعات کے اساتذہ اور سماجی کارکنوں تک۔
شاید کم ہی لوگوں کو یہ ایسے مواقع ملتے ہوں گے کہ وہ اتنے مختلف لوگوں کے قریب رہ کر ان کی سوچ، عقائد اور طرزِ زندگی کو دیکھیں، سمجھیں اور ان سے کچھ سیکھیں۔
ان برسوں میں، میں نے مختلف قوموں کے درمیان بہت سے اختلافات، جنگ اور جھگڑے دیکھے، لیکن اسی کے ساتھ ایسے لوگوں کو بھی دیکھا جو قومی اور ثقافتی اختلافات کے باوجود امن و سکون سے ایک دوسرے کے شانہ بشانہ زندگی گزار رہے تھے۔ آسانی ہو یا مشکل، خوشی ہو یا غم، امیری ہو یا غریبی، جشن ہو یا سوگ—وہ ایک دوسرے کے ساتھ مل جل کر رہ رہے تھے اور زندگی گزار رہے تھے۔
آہستہ آہستہ مجھے یہ سمجھ آنے لگی کہ معاشروں کے اندر اختلاف اور تضاد کی لہریں بھی سمندر کی لہروں کی طرح ہوتی ہیں؛ کبھی چھوٹی اور دلنواز، اور کبھی بلند، شدید اور خوفناک۔
تب مجھے یہ احساس ہوا کہ جس دنیا میں ہم رہ رہے ہیں، اگر اس کے لیے کچھ بہتر نہ سوچا جائے اور اس کو قابو میں نہ رکھا جائے تو یہ بہت وحشی اور خطرناک ہو سکتی ہے۔
اسی طرح ایک دن میں اس نتیجے پر پہنچا کہ ہر آرام و سکون کے بعد مشکل آتی ہے، اور ہر مشکل کے پیچھے آرام و سکون چھپا رہتا ہے۔
اور یوں میں نے یہ بھی سیکھ لیا کہ امن کے زمانے میں جنگ کے بارے میں سوچنا چاہیے، اور جنگ کے دوران جنگ کے بعد کے زمانے کی تیاری بھی کرنی چاہیے۔ جو لوگ آنے والے حالات کے بارے میں پہلے سے سوچتے ہیں اور بروقت حل تلاش کر لیتے ہیں، وہی کامیاب ہوتے ہیں۔
اب، دوسری عالمی جنگ کے کئی دہائیاں گزر جانے اور اس کے بعد سرد جنگ کے ایک طویل دور سے گزرنے کے بعد، مجھے محسوس ہوتا ہے کہ اس طویل امن و سکون کے پیچھے ایک بڑی جنگ کا خطرہ چھپا ہو سکتا ہے۔ اگر ہم نے جلد دنیا کے بنیادی مسائل کے حل کے لیے فیصلے نہ کیے، اگر لوگوں کے درمیان دوریاں کم نہ کیں، فاصلے ختم نہ کیے، امتیازات کو مٹانے کی کوشش نہ کی، اور اقوام کے درمیان باہمی افہام و تفہیم کے لیے ایک وسیع، نیا اور امید افزا راستہ نہ کھولا، تو ہم اپنا مستقبل کھو سکتے ہیں اور پوری انسانیت ایک عظیم تباہی سے دوچار ہو سکتی ہے۔
اس کتاب میں، میں نے اپنے عہد کے لوگوں کے سامنے جو تجویز رکھی ہے، وہ ان ممکنہ حلوں میں سے ایک ہے جو دنیا کو دوبارہ آمن و سکون کی طرف لے جا سکتی ہے۔
امید ہے کہ آپ اس کتاب کے مطالعے سے لطف اندوز ہوں گے—اور مستقبل کے بارے میں بروقت فیصلہ کریں گے۔
اور اب، اس سفر کے اختتام پر، میں دادا بن چکا ہوں۔
ایک بچہ ابھی ابھی دنیا میں آیا ہے؛ ننھا سا، بے بس، اور اس دنیا سے بے خبر جو اس کی منتظر ہے۔ اسے ابھی یہ بھی معلوم نہیں کہ اس نے کس صدی میں آنکھ کھولی ہے، اور نہ یہ کہ اس صدی نے اس کی نسل کے لیے اپنی آستین میں کون کون سے امتحان چھپا رکھے ہیں۔ لیکن میں جانتا ہوں۔ اور چونکہ مجھے پتہ ہے، اس لیے میں چھین کی نیند نہیں سو پاتا۔
سچ کہوں تو، میں نے یہ کتاب کسی اور کے لیے اتنی نہیں لکھی جتنی اس نومولود بچے کے لیے لکھی ہے۔
لہٰذا یہ چند صفحات میں اس نومولود کے نام کرتا ہوں؛ اپنے پوتے کے نام، اور اس کے وسیلے سے دنیا بھر کے ان تمام بچوں کے نام جو ان برسوں میں آنکھیں کھول رہے ہیں۔ اے میرے بیٹے، جس دنیا کی میں آپ کے لیے آرزو کرتا ہوں، شاید میں اسے اپنی آنکھوں سے نہ دیکھ سکوں۔ لیکن اگر ایک دن، آپ کی بنائی ہوئی دنیا میں، لوگ آسانی سے ایک دوسرے سے ملنے جا سکیں؛ اگر دنیا کے کسی دور افتادہ گوشے میں پیدا ہونے والا بچہ علاج یا تعلیم سے محروم نہ رہے؛ اور اگر کسی ماں کو اپنے بچے کو کسی بے مقصد جنگ کے حوالے نہ کرنا پڑے—تو جان لیجیے کہ آپ کے بزرگوں نے اپنی استطاعت کے مطابق اس دنیا کے لیے کوشش کی تھی۔
جو راستہ مجھے دکھائی دیا، اسے میں نے کاغذ پر لکھ کر آپ کے حوالے کر دیا ہے۔ اب اسے حقیقت بنانا آپ کا کام ہے۔
اللہ آپ کی حفاظت فرمائے، اور آپ کے لیے یہ راستہ اس سے کہیں آسان کر دے جو ہمارے لیے تھا۔
کیانوش رحمانی، مصنف